Franskur hvítlaukur frá Lautrec – Ail Rose

Hvítlaukurinn okkar bleiki og ljúfi sem við fáum frá Lautrec í Tarn-héraði Frakklands er einstök vara. Bleikröndóttur hvítlaukurinn kemur í knippum, bundinn saman á hefðbundna mátann, ýmist í hálfu eða heilu kílógrammi. Hann er ekki aðeins sérstakur vegna þess að hann býr yfir ógleymanlegu, fíngerðu og fjölvíðu bragði - heldur er hann fyrst og fremst sérstakur vegna þess að hann geymist svo vel. Við tókum tvö kíló af hvítlauk heim í lok ágúst 2025 og nú, er ég sit og skrifa þetta í júní 2026, höfum við klárað eitt kíló og erum ennþá að vinna okkur í gegnum annað, sem stendur ennþá fyrir sínu.

Hvítlaukurinn er merktur "Label Rouge", sem er strangt gæðavottunarmerki frá franska landbúnaðarráðuneytinu - og hann er sömuleiðis upprunavottaður (IGP). Það er einfaldlega ekki hlaupið að því að hafa uppi á eins góðum og flottum hvítlauk þótt víða væri leitað.

Vegna þess að þetta er einmitt vandfundinn og eftirsóknarverð vara fáum við aldrei eins mikið af honum og við viljum; við fáum hluta af einni uppskeru frá einum bónda einu sinni á ári og varan selst yfirleitt upp með miklum hraða og gauragangi strax í september-október, fáeinum vikum eftir að hún lendir hjá okkur. Nú höfum við tekið upp á því að opna á forskráningu fyrir hvítlaukinn - svo ef þú vilt tryggja þér eintak geturðu fyllt út formið hér að neðan, og við skrifum þér línu þegar hann er kominn í hús til okkar. Þú greiðir ekkert fyrirfram og ert ekki að skuldbinda þig með því að skrá þig.